Биылғы індеттің кесірінен шекаралар жабылып, мемлекеттер арасындағы сауда, транспорттық байланыс үзілді. Жоспарланған шаралар мен жобаларды жүзеге асыру мүмкін болмай отыр. Бұл өз кезегінде экономика, білім, әлеумет секілді өзге де салаларға коронадағдарыс тудырды. Әр мемлекеттің індетпен күресте енгізген шаралары да алуан болды. Бірі індет бой көтере бастаған сәттен-ақ қатаң тәртіп енгізсе, енді бірі жағдайдың әбден ушығып, бақылаусыз кеткенін күтті. Нәтижесінде, қоғамда осыған дейін «тұншығып» келген түрлі мәселелердің шеті шықты. Осылайша бұл қиындықтар ел үкіметтері үшін нағыз сынаққа айналды. Жағдай енді дұрысталды ма дегенде кей мемлекеттер коронавирустың қайта өршіп жатқанын мәлімдеді.
Індеттің әлем бойынша таралуына есеп жүргізетін Johns Hopkins университеті бүгін Жер шарында 38 миллионнан астам адамның коронавирус жұқтырғанын айтады. Солардың ішінде 1 млн 86 мың науқас қайтыс болған. Ал 26,4 млн адам індеттен құлан-таза айыққан. Қазақстанда да вирус жұқтырғандар саны 100 мыңдық межеден асып кетті. Жазбен салыстырғанда еліміздегі жағдай біраз тұрақталғанымен, денсаулық сақтау өкілдері екінші толқын қаупін айтып дабыл қағуда. Сол себепті де оқу орындары жыл соңына дейін қашықтан білім беруді жалғастыра бермекші.
«Егемен Қазақстан»газетінен ықшамдалып алынды.
