Аудан аумағында қар аралас жауын мен қатты дауыл салдарынан тау бөктеріндегі ауыл округтері мен елді мекендерде электр бағаналары жартылай құлап, сымдары үзілгендігі туралы жиі-жиі аудан жұртшылығын құлақтандырып отырдық. Аудан әкімі Мұхит Тұрысбеков шұғыл түрде зардап шеккен ауыл округтер мен елді мекендерді аралап, боран салдарын жою, электр желісін қалпына келтіру үшін әр ауыл округ бойынша жауапты етіп тиісті бөлім, мекеме басшыларын бекітіп, арнайы тапсырмалар жүктеді.
-“Оңтүстік Жарық Транзит” ЖШС тарапынан өзге аудан, қалалардан арнайы бригадалар мен аудан әкімдігі қызметкерлері күшейтілген жұмыс тәртібіне көшіп, уақытпен санаспай жұмыс атқара білді. Сонымен қатар, аудан аумағындағы өндіріс орындары мен «Торлан Строй» ЖШС арнайы техникалармен көмек берсе, бірқатар елді мекен тұрғындары арасынан ел ағалары мен ерікті жастар аталған жұмысқа ұйымшылдықпен жұмыла білді.
Бүгінгі таңда күшейтілген жұмыстар нәтижесінде, ауданның барлық елді мекендерінде құлаған электр бағаналары толықтай қалпына келтіріліп, электр жарығы берілді.
Осы орайда аудан тұрғындарына түсіністік пен сабырлық танытқаны үшін алғысымызды білдіреміз!,-дейді аудан басшысы.
(Созақ үні газетінің №06 21.01.2023ж басылымынан)
